As reformas de pensións están a dinamitar o sistema público

As reformas das pensións están a cumprir o seu obxectivo á perfección, recortar e dinamitar o sistema público de pensións.

Os últimos anos as pensións sufriron dúas grandes reformas co único obxectivo de recortalas. En 2011 o Goberno arremeteu contra o sistema público de pensións con recortes e outras medidas de axuste tremendas. En 2013, o Goberno seguiu por esta mesma liña. Todas estas reformas tiveron un mesmo obxectivo, empeorar as condicións das pensións públicas.

A reforma de 2011, as principais medidas que contiña eran: atrasar a xubilación dende os 65 anos aos 67 anos, incrementar de 15 a 25 anos o cálculo da base reguladora, subir os anos de cotización esixidos a 37 para poder cobrar o 100% da pensión, incrementar a idade mínima para a xubilación anticipada aos 63 anos, e tamén se introduciu o chamado "factor de sostibilidade", que é un mecanismo para facer recortes futuros das pensións, baixo a idea de que cada vez vivimos máis, polo que a contía das pensións debe modularse en función do tempo que se vaia recibir.

A reforma de 2013, implementou estas medidas: concretouse o "factor de sostibilidade", e eliminouse a obriga de incrementar as pensións conforme ao IPC, establecendo un "índice de revalorización" que se calcula conforme a unha complexa fórmula matemática, cun mínimo do 0,25% e un máximo do IPC máis o 0,25%.

As pensións subiron o mínimo no 2015, isto é o 0,25%. Así sucedeu tamén en 2014.

E o peor é que o grupo fiscalizador que se creou para facer seguimento da reforma do artigo 135 da constitución (para asegurar a prioridade de pagamento da débeda pública), previu que a suba das pensións será do 0,25% ata 2020, como mínimo, o que vai supoñer unha importante perda de poder adquisitivo para todas as persoas que cobran unha pensión.

Ademais, este mesmo organismo fiscalizador analizou os cálculos do Goberno nas súas previsións. A conclusión foi que a previsión sobre os ingresos do sistema de pensións que fai o Goberno non son fiables.

Isto significa que se non se cumprisen estas previsións, aínda se farían maiores recortes nas pensións públicas.

A conclusión é clara, as reformas das pensións están a cumprir o seu obxectivo á perfección, recortar e dinamitar o sistema público de pensións.